Your name:

Your email:

Your message:

عن الزمالك – ومصاعب جولة جديدة

فى البداية ..عاوز اوضح ان اغلب اسباب التأخر عن التدوين لنادى الزمالك ..سببها إنشغالنا احنا كمشجعين بكل التفاصيل الأخيرة واللى كادت فى مرات كتير انها تسبب اذى بالغ للنادى والمشجع ..للرمز ..وعلى فرض الكلام ..النادى اصيب فعلاً..فى وشه ..وفى ملعبه ..ولم يمر الدور الأول بدون مفاجآت ..واللى مش مصدق يراجع ماتش إنبى او يسترجع تفاصيل إهانة احد ابطال السيرة الشعبية – كابتن حازم إمام – عشان شئ اسمه ستو ..او جدو

هنقول ايه ؟ ..هنقول ان الزمالك زى كل سنة مطالب بمواجهة العديد من الخصوم ..بداية بالأهلى مروراً بإتحاد الكورة ثم الإعلام الجاهل ثم جمهوره ثم ابناءه او اللى عاملين نفسهم كده ..وزى كل سنة هيهزم معظمهم ..بس الأكيد ان واحد من الخصوم دول على الأقل هيقدر يؤذى الزمالك ..هما كتير ..والزمالك لوحده ..وعلى اساس القاعدة الحسابية ..الكترة تغلب الشجاعة

الأهلى بيحاول يعمل ايه ؟ الأهلى ..جمهور ومسئولين ..عارفين كويس ان اى مواجه مباشرة مع الزمالك فى جو الغرفة الطبيعى هتحسم لصالح الأفضل ..اللى هو الزمالك ..عشان كده ..طول اولقت بيتم خلق ميادين اخرى للزمالك خارج الملعب ..حتى اوضة اللبس ..دلوقتى الزمالك اصبح مطالب بالجهاد داخلها ..ضد لاعبيه السذج اللى محتاجين درس فى الإحتراف ..وبناء عليه..اصبح من الوارد جداً ان يحقق الزمالك نصر وحيد ..وبالصدفة من الممكن ان يصبح هذا النصر خارج الملعب ..بل هذا هو الغالب

تحديات مجلس الإدارة الجديد ..فين القناة التلفزيونية ؟ فين الصفقات الحقيقية وليست الإضطرارية ؟ ليه مابيتمش إستغلال امكانية إحتراف اللاعب فى حالة إنضمامه للزمالك وإستحالة المثل فى حالة إنضمامه للأهلى ..طب فعلاً ..حقيقى ...دلوقتى ..اللاعب ..هيروح الزمالك ليه ؟

فين البطولات ؟

فين الناشئين ؟

فين الخطين الحمر اللى مش باينين من الأعلان (( الأحمر )) المطبوع عليهم ؟

فين ...الزمالك ؟

J

ماذا نتعلم فى كل مرة : صانع اللعب

من البداية يجب ان نعترف بمجهود مجلس الإدارة الجديد..الذى اورثته المجالس المعينة والطعون وإتحاد الكرة ..تركة ثقيلة ..تسمى بمأساة الزمالك ..وبدأت الإدارة الجديدة فى الإصلاح التدريجى لكل اساسيات النادى من الداخل ..كما صورت لها خبرتها الضئيلة فى إصلاح النادى ..المشكلة اننا دوماً نخنق الجديد ..بالتمسك بفتاوى عدم  جدواه ..وإنتقاده ..ومحاصرته وتشتيته ..ولا جديد

وانشغلت الإدارة بتدعيم فريق الكرة ..بصفقات جديدة ..كلها جيدة ..وخاصة صفقتى ( رحيم ايو ) الغانى و ( احمد جعفر ) مهاجم الإتصالات الواعد ..ويجب ان نعترف جميعاً ..اننا ضيعنا وقتاً كثيفاً فى صفقة ..لم تكن تستحق نصف الإهتمام بها ..صفقة شريف عبد الفضيل ..وكان يجب ان نتذكر جيداً المثل القائل ( كان العلأ نفع نفسه ) وهذا تشبيه فج ..ولكنه سليم ..فلو كان شريف عبد الفضيل مدافع سوبر ..كان الإسماعيلى إستفاد به طوال الأربعة سنوات الماضية التى ارتدى فيها تى شيرت الإسماعيلى ..والشئ الوحيد حسن الذكر فى تلك الصفقة هو عدم إتمامها ..فتكلفة تلك الصفقة كانت ضرورية لتدعيم مركز أخر هام وخطير للغاية ..وهو مركز صانع الألعاب ..فالزمالك فعلياً لا يمتلك الا لاعبين فقط فى هذا المركز (شيكابالا ) و( علاء على )

والحقيقة ان كلا اللاعبين يعانيان من عدد كبيرمن العيوب الخطيرة ..فالأول ..لاعب جيد اكثرمما يجب ..يشبه اعلام التاريخ ..الذين عاشوا وماتوا ولم يفهمهم احد ..وليس خطأه ..ولا نحن ايضاً !

والثانى ..علاء على ..لا يحتمل وحده حمل فانلة الزمالك التى اصبحت عبئاً على كل من لا يستحقها

ماذا نحتاج فى اول موسم للإنتقالات ؟

أ مدرب مصرى الجنسية

ب اثنين من المدافعين على الأقل ..لا يزيد عمر اياً منهما عن 20 سنة

ج عدد كبير جداً من صانعى الألعاب ..فالزمالك يمتلك احد افضل خطوط الهجوم فى مصر ..اقصد ..سيد مسعد / احمد فتحى (بوجى ) / احمد جعفر / شريف اشرف ..وكى نستفيد اقصى استفادة ممكنة من هذه الترسانة ..يجب ان نضمن تغذيتها بأكبر عدد ممكن من الحلوى ..وللحلوى ..نستحضر موزعى الحلوى على المهاجمين ...صانعى اللعب الأسطوريين الذين يصنعون من الفرق الجديدة والشابة ..فريق متضامن متحد ..متواضع ..يتعلم فى كل مباراة ان البطل الحقيقى هو الزمالك ..وليس احد اللاعبين

س: ايه اللى ناقص ؟ ج : فى البدء ..إتقان اللعب

يخسر الزمالك من طلائع الجيش ..بهدف للاشئ

بعد الماتش ..يتصل بيا صديق زملكاوى ويتساءل ..ايه اللى ناقص ؟ وكان ردى ان السؤال ده تقليدى جداً وبدأنا نسمعه من اول ماتش بتروجيت ..انا شخصياً  شايف انه سؤال ساذج جداً وفى غير محله لعدة اسباب

اولاً ..فرقة الزمالك ..الفرقة دى ..بالأسماء والقدرات دى ..السنة اللى فاتت كانت بتنافس على الهبوط لدروى القسم الثانى ..هل لمجرد ان الفريق تم تدعيمه بأكثرمن لاعب فى اكثرمن مركز ..فجأة بقينا مؤهلين للحصول على بطولة الدورى ؟؟؟..وخصوصاً ان فيه اكثرمن لاعب بيهدد بشكل مكتوم بالإحتراف فى اول موسم إنتقالات قادم ..بمعنى ..ان الفرقة محتاجة صفوف من اللاعبين الدائمين اصحاب الولاء العريض المؤمن لتحقيق الإنسجام ..

ثانياً ..عشان نحصل على بطولة الدروى لازم يكون عندنا اكتر من لاعب مميز فى كل خط من الخطوط التلاتة ..والزمالك لا يمتلك ..وعاوز اكد على كلمة ( يمتلك ) ..الزمالك لايمتلك الا حراس مرمى مميزين فقط ..كل الخطوط بلا نجوم ..بلا لاعبين مميزين ..والزمالك يمتلكهم تماماً ..لأن عمرو زكى او ميدو ..او حتى شيكابالا بيلوحوا بالإحتراف طول الوقت ..خصوصاً مع إنتشار نشاط  وكلاء اللاعبين وسعى الأهلى الحثيث للتخلص من نجوم الفرق المنافسة بضمهم او اجبارهم على الإحتراف ..زى ما حصل مع حسنى عبدربه اللى امتنع عن الإنضمام للأهلى ..

ايه اللى ناقص ؟

اننا نتعلم ازاى نكسب فى الأول..بغض النظر عن مركزنا فى جدول الدورى ..ومش مهم اى عدد من الخسائر او التعادلات ..مش مهم حتى اسم المدرب..فى الحقيقة الفرقة لازم تكون فرقة منسجمة تدرك معنى الثلاث نقاط ..وبالعكس ..النقاط اللى جمعها الزمالك من بداية الدورى كلها نقاط جت بالصدفة ..لكن ماتش زى ماتش المقاولين مثلاً كان ماتش جيد جداً لأن الزمالك نفذ اللى كان بيلعب علشانه ..بعكس مثلاً ماتش زى ماتش الإتحاد ..اللى الزمالك فيه حصل على ضربة حرة مباشرة بثلاث نقاط ..وده تحديداً ضد صحة الفريق ..لأن هزيمة بعد اداء رائع وفرص ضائعة ..افضل من مكسب بالصدفة بعد اداء هزيل ومخيب ..

اللى ناقص ..ان الفرقة تتعلم ازاى تكسب ..وتحافظ على مكسبها ..

اللى ناقص ..الصبر ..على الفرقة والكف تماماً على التعامل مع الفريق على انه فريق هيحصل على بطولة الدورى لأن ده هيحط ضغط عصبى هائل على الفرقة فى كل ماتش ..وده غير مطلوب حالياً

اللى ناقص اكثر من صانع العاب بالمواصفات الآتية 

أ التواضــــــــــــــــــــــــع

ب الإخــــــــــــــــــــــــــلاص للزمالك

ج الإستمــــــــــــــــــــــــــــــرار اطول فترة ممكنة مع الفريق لتحقيق اكبر كم ممكن من الإنسجام

اللى ناقص ..الزمالك شخصياً

مئوية الزمالك فى الدرجة التانية ..ودرس المحلية

احنا محتاجين نتصدم كام مرة قبل ما نعرف ان المدرب المحلى فقط هو اللى معاه مفاتيح اللاعب المصرى ؟ هو اللى معاه مفاتيح الدورى والماتش المصرى ؟ ..مفاتيح الزمالك المصرى ..

الموضوع بسيط ومش محتاج اى تعقيدات ..مدرب مصرى يتولى المهمة فى الأسابيع الباقية من عمر الدورى عشان يضمن للفريق مركز متوسط فى الجدول وتنتهى القضية وفى فترة التوقف يبتدى الأستعداد من اول وجديد ..على نضيف وعلى اسس ومع ادارة منتخبة ..بديموقراطية حقيقية ..مش زى كل مرة

دوكستال هايل ..وعنده فكر ..بس فى النهاية بيدرب فريق عمره ما شجعه وعمره ما هتف بأسمه وتلاقيه اصلاً ما يعرفش اى حاجة عن تاريخ الزمالك ..تاريخه فى مصر ..الدورى ..الكأس ..مع الأهلى ..فى افريقيا ..فى كاس العالم للأندية ..ميعرفش الزمالك جمهوره كام مليون على وجه الدقة ..ميعرفش الزمالك بيمد المنتخب بكام لاعب فى كل معسكر وفى كل بطولة ..ميعرفش ان مدرب المنتخب القومى الأول كان لاعب فى الزمالك ..ميعرفش ان رئيس المجلس القومى للرياضة فى بلد النادى اللى بيدربه ..برضه زملكاوى ..ميعرفش قيمة الفريق فبالتالى بيعمل نتايج متناسبة مع حجم جهله ..المفروض ان كل مدرب بييجى الزمالك يتعمله محاضرات عن تاريخ الفريق وقدراته وجمهوره وقائمة كاملة بلحظات سعادة او تعاسة الفريق ..عشان يبقى عارف هو بيعمل ايه ..كل ده استحالة يحصل فى سنة واحدة او اكتر ..ده تلاقى جوزيه مدرب الأهلى ميعرفش واحد على عشرة من المعلومات دى عن الفريق اللى بيدربه ..ازاى بنتوقع العكس مع الزمالك ..فى ظل ظروفه الحالية ؟؟

يبقى الحل المدرب المحلى و اللاعب المحلى اللى مايخجلش انه يقول انا زملكاوى ..ما بيتكسفش منها مهما يسمع ومهما يحصل معاه ..الزمالك فى ازمة من فترة طويلة جداً والمرض بيتطور عليه وبيزيد وممكن نلاقى فجاة الزمالك راح بدون رجعة ..لأن اذا كنا متصورين ان نزول الدرجة التانية هو نهاية اللى بيحصل فى الزمالك من فترة والسكينة سارقانا ..اذا كنا فاكرين كده فممكن ببساطة يكون القدر محضرلنا مفاجأة تانية ..لأن نزول الدرجة التانية ممكن يكون البداية لهزايم تالتة ورابعة ..ووارد جداً دلوقتى اننا نسمع ان الزمالك نزل من الدرجة التانية للدرجة التالتة ..وخد عندك ..واظن احنا اتعلمنا انه مفيش مستحيل ..وحازم امام شخصياً فى التلفزيون قال مرة ان الزمالك استحالة يقرب من منطقة الخطر فى جدول الدورى ..وادينا اهو ..مستنين هزيمتين تلاته جايين لا محالة ..والموضوع يخلص والزمالك يبدأ يحضر نفسه للأحتفال بمئويته وهو نادى فى الدرجة التانية ...يااااااه ..اول مئوية للزمالك وهو نادى فى الدرجة التانية ...مستنيين ايه تانى يحصل ..

الأسماء كتير ..

محمود سعد ...محمد حلمى ..وغيرهم ..

امتى هنتحرك ومايكونش لسه فات الأوان الحركة ؟؟؟؟؟